Saturday, June 24, 2017

സംസ്കാരജാലകം-29


സംസ്കാരജാലകം-29
ഡോ.ആർ.ഭദ്രൻ
















ത്രോൺ ഓഫ് ബ്ലഡ്






പ്രശസ്ത ജാപ്പനീസ് സംവിധായകൻ കുറസോവയുടെ ‘ത്രോൺ ഓഫ് ബ്ലഡ്’ ഒരിക്കൽക്കൂടി കാണുവാനിടയായി. വില്യം ഷേക്സ്പിയറിന്റെ പ്രശസ്തമായ മാക്ബെത്ത് നാടകത്തിന്റെ ചലച്ചിത്രരൂപമാണത്. ലോകമുള്ള കാലത്തോളം ഈ ചലച്ചിത്രത്തിന്റെ മഹത്വത്തിന്‌ തെല്ലും ഇടിവ് സംഭവിക്കാൻ പോകുന്നില്ല. ജാപ്പനീസ് സംസ്കാരത്തിലേക്കുള്ള മാക്ബെത്തിന്റെ കൾച്ചറൽ റീ റീഡിംഗാണ്‌ ഈ സിനിമ. സ്റ്റൈലൈസ്ഡ് അഭിനയത്തിന്റെ അവാച്യമായ ഭംഗി എന്താണെന്ന് ഈ സിനിമ കാണിച്ചുതരുന്നു. ഷേക്സ്പിയറിന്റെ മാക്ബെത്തിന്‌ ലോകത്ത് അനവധി അനുവർത്തനങ്ങൾ ഉണ്ടായിട്ടുണ്ടെങ്കിലും അതിൽ ഏറ്റവും മെച്ചമായിരുന്നത് ‘ത്രോൺ ഓഫ് ബ്ലഡ്’ ആണെന്ന് നിസ്സംശയം പറയാം. കൾച്ചറൽ മെറ്റഫറുകളെ സിനിമാഖ്യാനത്തിൽ നന്നേ പ്രയോജനപ്പെടുത്തിയിട്ടുണ്ട്.


ഡോ.ജോസ് .കെ.മാനുവൽ




ഭാഷാപോഷിണി 2017 മാർച്ച് ലക്കം 3 ൽ എഴുതിയ സൈബർ ആധുനികതയും മലയാളിയും എന്ന ലേഖനം മലയാള ഭാഷാവ്യവസ്ഥയെ മുന്നോട്ടു നയിക്കുന്ന ലേഖനമാണ്‌. ഉത്തരാധുനികതയ്ക്ക് അപ്പുറം നാം ഇന്ന് സൈബർ ആധുനികതയിൽ എത്തിനിൽക്കുകയാണ്‌. സൈബർ ആധുനികത മലയാള ഭാഷയിലും സംസ്കാരത്തിലും സൃഷ്ടിക്കുന്ന വ്യതിയാനങ്ങളും അതിന്റെ നാനാതരത്തിലുള്ള പ്രശ്നങ്ങളും ഈ ലേഖനത്തിൽ ജോസ്.കെ.മാനുവൽ സാർ നന്നായി വിശകലനം ചെയ്തിട്ടുണ്ട്. ഈ സാങ്കേതികവിദ്യകളുടെ ആധിക്യം കാരണം ജീവിതം പൊറുതിമുട്ടി എന്ന് ചിന്തിച്ച് കാലത്തിനൊപ്പം മുന്നോട്ട് സഞ്ചരിക്കാൻ കഴിയാത്തൊരാളാണ്‌ ഞാൻ. മാനുവൽ സാർ അങ്ങനെയൊരാളല്ല. ഇതിന്റെ അനന്തസാധ്യതകളിൽ അഭിരമിക്കുന്ന ഒരാളാണ്‌. സിനിമയെക്കുറിച്ചും സൈബർ സാങ്കേതികവിദ്യകളെക്കുറിച്ചും അതിന്റെ ഭാഷാപരവും സൗന്ദര്യാത്മകവുമായ പ്രശ്നങ്ങളെക്കുറിച്ചും ഉയർന്ന ചിന്തകൾ അവതരിപ്പിക്കുന്നത് മലയാള ഭാഷയ്ക്കും സംസ്കാരത്തിനും ഏറെ ഗുണം ചെയ്യും.


പ്രണയമരത്തിലെ പൂക്കൾ - റസീന കടേങ്ങൽ




കണ്ണൂർ പായൽ ബുക്സ് പുറത്തിറക്കിയിരിക്കുന്ന കവിതാസമാഹാരമാണ്‌ റസീന കടേങ്ങലിന്റെ ‘പ്രണയമരത്തിലെ പൂക്കൾ’. മലയാള കവിതയുടെ ഭാവുകത്വ നിർമ്മിതിയിൽ ഈ കവിതകൾ പുതിയ ഒരധ്യായമാണ്‌ എഴുതി ചേർത്തിരിക്കുന്നത്. പ്രണയം കേന്ദ്രപ്രമേയമായി വരുന്ന ഈ സമാഹാരത്തിലെ കവിതകൾ ജീവിതവും സാമൂഹ്യപ്രശ്നങ്ങളുമെല്ലാം തികച്ചും പുതിയതായ കാവ്യബിംബങ്ങളിലൂടെ വലിയൊരു കാവ്യാനുഭവം തന്നുകൊണ്ടാണ്‌ നിർമ്മിക്കപ്പെട്ടിരിക്കുന്നത്. ലളിതസുന്ദരദീപ്തമാണ്‌ ഓരോ കവിതകളും. മലയാള കാവ്യലോകാനുഭവത്തിൽ ഏറെ ശ്രദ്ധിക്കപ്പെടേണ്ട ഒരു കാവ്യസമാഹാരാമാണിത്. ആലപ്പുഴയിൽ എഴുത്തുകൂട്ടത്തിന്റെ ആഭിമുഖ്യത്തിൽ പ്രസിദ്ധ കവി കുരീപ്പുഴ ശ്രീകുമാർ ആണ്‌ പ്രകാശനകർമ്മം നിർവ്വഹിച്ചത്. മലയാള സാഹിത്യം പ്രതീക്ഷയോടെയാണ്‌ റസീനയെ ഉറ്റുനോക്കുന്നത്.


പി.വിശ്വംഭരൻ-ആദർശവാദിയായ രാഷ്ട്രീയനേതാവ്


കേരളത്തിലെ സോഷ്യലിസ്റ്റ് രാഷ്ട്രീയ പ്രസ്ഥാനത്തിന്റെ അമരക്കാരനായിരുന്നു പി.വിശ്വംഭരൻ. അദ്ദേഹം രണ്ട് തവണ എം.എൽ.എ യും ഒരുതവണ എം.പി യും ആയി. കറകളഞ്ഞ രാഷ്ട്രീയ വ്യക്തിത്വത്തിനുടമയായിരുന്നു അദ്ദേഹം. വിശ്വംഭരന്റെ മരണത്തോടുകൂടി നിർമ്മല രാഷ്ട്രീയവ്യക്തിത്വത്തിന്റെ ഒരു കണ്ണിയാണ്‌ അടർന്നുമാറിയത്.


യു.കെ.കുമാരൻ - വയലാർ അവാർഡ്



യു.കെ.കുമാരന്റെ ‘തക്ഷൻകുന്ന് സ്വരൂപ'ത്തെ ക്കുറിച്ച് സംസ്കാരജാലകം നേരത്തെ തന്നെ എഴുതിയിട്ടുള്ളതാണ്‌. ദേശചരിത്രം പ്രതിപാദിക്കുന്ന ഈ നോവൽ അൽപം താമസിച്ചാണെങ്കിലും വയലാർ അവാർഡിന്‌ തെരഞ്ഞെടുത്തത് സന്തോഷകരമാണ്‌. നോവലിന്റെ ആഖ്യാനത്തിൽ സ്ഥലരാശി വളരെ നിർണ്ണായകമാണ്‌. അതുകൊണ്ടാണ്‌ ദേശകേന്ദ്രീകൃതമായ നോവലുകൾ വായനക്കാരെ ഏറെ സ്വാധീനിക്കുന്നത്.


ജോയിക്കുട്ടി പാലത്തുങ്കൽ

കൊല്ലം ഫാത്തിമ മാത നാഷണൽ കോളേജിലെ മലയാള അധ്യാപകനും എഴുത്തുകാരനുമായ ജോയിക്കുട്ടി പാലത്തുങ്കലിന്റെ മരണം സാംസ്കാരിക കേരളത്തിന്‌ വലിയ നഷ്ടമാണ്‌ വരുത്തിവെച്ചിരിക്കുന്നത്. നോവലിസ്റ്റ്, ചെറുകഥാകൃത്ത് എന്നീ നിലകളിൽ അദ്ദേഹം ശ്രദ്ധേയനായിരുന്നു. അദ്ദേഹം എഴുതിയ 'കുഞ്ചൻ നമ്പ്യാരുടെ ജീവചരിത്രം' നമ്മുടെ സാഹിത്യപഠനശാഖയ്ക്ക് ഒരു മുതൽക്കൂട്ടായിരുന്നു. അദ്ദേഹത്തിന്റെ ശിഷ്യരോടൊപ്പം സംസ്കാരജാലകവും അനുശോചിക്കുന്നു. കേരളത്തിലെ പ്രഗത്ഭരായ പല മലയാളം പ്രൊഫസർമാരും കേരളത്തിന്റെ സാംസ്കാരികജീവിതത്തിന്‌ നൽകിയ വിലപ്പെട്ട സംഭാവനകൾ ഗവേഷണപഠനത്തിന്‌ വിഷയമാക്കേണ്ടതാണ്‌.

സംക്രമണം - ആറ്റൂർ രവിവർമ്മ




മലയാളത്തിലെ അസാധാരണമായ ഒരു കവിതയാണ്‌ ആറ്റൂർ രവിവർമ്മയുടെ 'സംക്രമണം'. ഭാഷയെ അസാധാരണമായി അപരിചയവത്കരിച്ചുകൊണ്ടാണ്‌ ആറ്റൂർ ഈ നേട്ടം കരസ്ഥമാക്കിയിരിക്കുന്നത്. പെണ്ണിന്റെ സഹനത്തിന്‌ ഭാഷ കൊണ്ടൊരു ശിൽപം നിർമ്മിച്ചെടുക്കുകയാണ്‌ കവി. ആ കൊത്തുപണിക്ക് കവിക്ക് ഒരു പൂർവ്വസൂരി ഉണ്ടെങ്കിൽ അത് ഇടശ്ശേരിയല്ലാതെ മറ്റാരുമല്ല.


ഓംപുരിക്ക് അനുശോചനം





ഇന്ത്യൻ സിനിമയുടെ അഭിമാനമായിരുന്നു ഓംപുരി. ഇന്ത്യയ്ക്കകത്തും പുറത്തുമായി നിരവധി സിനിമകളിൽ അദ്ദേഹം വേഷമിട്ടു. കച്ചവടസിനിമകളിലും ആർട്ട് സിനിമകളിലും അദ്ദേഹം ഒരുപോലെ തിളങ്ങി. അണഞ്ഞുപോയ ഈ കലാദീപത്തിനു മുന്നിൽ പ്രണാമങ്ങളർപ്പിക്കുന്നു.


ഇനിയും പാടുന്നു - ചവറ.കെ.എസ്.പിള്ള




ഈ അടുത്ത സമയത്ത് വായിച്ച ഏറ്റവും മികച്ച ഒരു കവിതയാണ്‌ ചവറ.കെ.എസ്.പിള്ളയുടെ ‘ഇനിയും പാടുന്നു’ (ജനയുഗം വാരാന്തപ്പതിപ്പ്, 23 ഏപ്രിൽ 17). കവിക്ക് ആരാധകരർപ്പിക്കുന്ന സ്നേഹത്തിന്റെ മഹനീയമായ സൂചനകൾ നൽകിക്കൊണ്ടാണ്‌ കവിത ആരംഭിക്കുന്നത്. അധ:സ്ഥിതരുടെ വിമോചനം, പരിസ്ഥിതിയോടുള്ള ജാഗ്രത, ദളിതരോടുള്ള പ്രതിബദ്ധത എല്ലാം കവി കവിതയിലൂടെ അരക്കിട്ടുറപ്പിക്കുകയാണ്‌. മർദ്ദിതരുടെ വിമോചനത്തിനു വേണ്ടിയുള്ള ചുവന്നദർശനത്തിന്റെ പോരാട്ടത്തോടൊപ്പമാണ്‌ കവി എപ്പോഴും. അവർക്ക് വേണ്ടി കവി ഒരുപാട് പാടിക്കഴിഞ്ഞു. കവിയുടെ പ്രതിഭ ക്ഷീണിച്ചിട്ടില്ല. ഇനിയും അവർക്കുവേണ്ടി പാടാൻ കവി മനസ്സിനെ തയ്യാറാക്കുന്നുണ്ട്. കമ്മ്യൂണിസത്തിനുണ്ടായ പിളർപ്പ് കവിമനസ്സിനെ ആഴത്തിൽ മുറിപ്പെടുത്തിയിട്ടുണ്ട് എന്ന് കവി തന്നെ സാക്ഷ്യപ്പെടുത്തുന്നു. ഇന്ത്യയിലെ ഇടതുപക്ഷരാഷ്ട്രീയം ശ്രദ്ധയോടെ വായിക്കേണ്ട കവിതയാണിത്. അതുണ്ടാകുമെന്ന് തോന്നുന്നില്ല. കാരണം, ഇടതുപക്ഷരാഷ്ട്രീയം കലയുടെ പ്രവചനങ്ങൾക്ക് ചെവി കൊടുക്കുന്ന കാലം എന്നേ കഴിഞ്ഞിരിക്കുന്നു. കവിതയുടെ ചാരിത്ര്യം കാത്തുസൂക്ഷിക്കുന്ന ഉന്നതമായ ചില ഉപദർശനങ്ങളും കവിതയിലുണ്ട്.

ഒന്നുണ്ട് പ്രാർത്ഥന, വഴിവാണിഭത്തി
കെണിയിൽ തളയ്ക്കല്ലേ കാവ്യകലയെ
കൊടിമന്ദിരത്തിൽ കുടിയിരുത്തല്ലേ
കുടിലതന്ത്രത്താൽ വകവരുത്തല്ലേ
ഇനിയും പാടുന്നു മാനവാത്മാവിലെ
കൊടിയ ദുഖത്തിൻ ദുരിതാനുസാരി
ഇനിയും പാടുന്നു വന്നുദിയ്ക്കുന്നൊരു
കുങ്കുമപ്പുലരിതൻ സങ്കീർത്തനങ്ങൾ.

ചുവന്നദർശനത്തോടുള്ള അനന്തമായ പ്രതിബദ്ധതയുടെ നിത്യനിരാമയ സ്മാരകമാണ്‌ ഈ കവിത. ചവറ.കെ.എസ്.പിള്ള സാറിന്‌ സംസ്കാരജാലകത്തിന്റെ അനുമോദനങ്ങൾ. ഈ കവിത എന്നെ ചവറ കെ.എസ്.പിള്ള എന്ന കവിയുടെ കാലാതിവർത്തിയായ ഒരു ആരാധകനാക്കി മാറ്റുന്നു.

ജഗന്നാഥവർമ്മയ്ക്ക് പ്രണാമം




ചലച്ചിത്ര-സീരിയൽ നടനും കഥകളിനടനും ചെണ്ടവാദകനുമായ ജഗന്നാഥവർമ്മയുടെ വിയോഗം കേരളീയ കലാലോകത്തിന്‌ വലിയ നഷ്ടമാണ്‌ വരുത്തിവെച്ചിരിക്കുന്നത്. അഞ്ഞൂറോളം ചലച്ചിത്രങ്ങളിൽ വേഷമിട്ട വർമ്മ മലയാളസിനിമയ്ക്ക് വലിയ സംഭാവനകളാണ്‌ നൽകിയിട്ടുള്ളത്. വർമ്മയുടെ ആകാരം പോലെ അഭിനയവും ഗൗരവത്തിന്റെ ഭാഷയിലുള്ളതാണ്‌. അതുകൊണ്ടാണ്‌ പ്രതിനായകനായും അദ്ദേഹത്തിന്‌ ശോഭിക്കാൻ കഴിഞ്ഞത്. സ്വഭാവനടനെന്ന നിലയിൽ സവിശേഷതയാർന്ന അഭിനയലോകവും അദ്ദേഹം കാഴ്ചവെച്ചിട്ടുണ്ട്.


ചാനലുകൾ മരുന്നുകൾ കുറിക്കരുത്.

ഉത്തരാധുനികലോകം പരസ്യങ്ങളുടെ ഒരു ലോകം കൂടിയാണ്‌. പരസ്യങ്ങളുടെ രാഷ്ട്രീയം സംസ്കാരജാലകം ഒരുപാടെഴുതിയിട്ടുണ്ട്. ഏറ്റവും കൂടുതൽ അപകടം ക്ഷണിച്ചുവരുത്തുന്നതാണ്‌ ടി വി ചാനലുകളിൽ വരുന്ന ഔഷധങ്ങളുടെ പരസ്യം. ആയുർവേദ-അലോപ്പതി മരുന്നുകളുടെ ധാരാളം പരസ്യങ്ങൾ ചാനലുകളിൽ വരുന്നുണ്ട്. കബളിപ്പിക്കപ്പെടുന്ന വിഡ്ഢികളായ കാണികൾ ഇതെല്ലാം വാങ്ങിച്ച് നിർലോഭം ഉപയോഗിക്കുകയാണ്‌. നമ്മുടെ ആരോഗ്യവകുപ്പ് ഈ കാര്യത്തിൽ ഇനിയെങ്കിലും ശ്രദ്ധിക്കണം. മരുന്നുകൾ കുറിക്കേണ്ടത് ഡോക്ടർമാരാണെന്നും ചാനലുകൾക്ക് അതിന്‌ അധികാരമില്ലെന്നും നമ്മുടെ ആരോഗ്യവകുപ്പ് ഇനിയെങ്കിലും മനസ്സില്ലാക്കേണ്ടതല്ലേ?

O





Wednesday, March 22, 2017

സംസ്കാരജാലകം-28

സംസ്കാരജാലകം-28
ഡോ.ആർ.ഭദ്രൻ













എം.എൻ.കാരശ്ശേരി




എം.എൻ.കാരശ്ശേരി മലയാളത്തിലെ ശ്രേഷ്ഠനായ എഴുത്തുകാരനാണ്‌. വായനാക്ഷമതയുള്ള നല്ല ഗദ്യത്തിന്റെ ഉടമയുമാണ്‌ അദ്ദേഹം. ഭാഷ ഒരു മലയാളിയെ (ആഗോളമലയാളിയെയും) എങ്ങനെ നിർമ്മിക്കുന്നു എന്നതിന്റെ രസകരമായ അവതരണമാണ്‌ ‘ഭാഷയിലാണ്‌ ഭാഷയാണ്‌ കേരളം’ എന്ന മാതൃഭൂമി ആഴ്ചപ്പതിപ്പിലെ (30.10.2016) ലേഖനത്തിൽ. ഭാഷയാണ്‌ നമ്മുടെ ദേശീയതയെ സൃഷ്ടിക്കുന്നത് എന്ന ഇ.എം.എസിന്റെ ചിന്തയുടെ തുടർച്ചയാണ്‌ ഈ ലേഖനം.


ബാലമുരളീകൃഷ്ണയ്ക്ക് പ്രണാമം





ബാലമുരളീകൃഷ്ണയുടെ ദേഹവിയോഗം സംഗീതലോകത്തിന്‌ തീരാനഷ്ടമാണ്‌ വരുത്തിവെച്ചിട്ടുള്ളത്. സംഗീതലോകത്ത് വിപ്ലവകരമായ മാറ്റങ്ങൾ സൃഷ്ടിക്കാനാണ്‌ ഈ നാദോപാസകൻ ശ്രമിച്ചിട്ടുള്ളത്. ബാലമുരളീകൃഷ്ണയുടെ ദേഹവിയോഗത്തിൽ സംസ്കാരജാലകവും അനുശോചനം പങ്കുവെക്കുന്നു.


പു.ക.സ കാരോട് പറയാനുള്ളത്.

കഴിഞ്ഞ കാൽനൂറ്റാണ്ടുകാലത്തോളമായി പുകസയോടൊപ്പം നടന്നവരാണ്‌ ഞങ്ങൾ. ഇപ്പോഴത്തെ പുകസ നേതാക്കന്മാർ പ്രസംഗിക്കുന്നത് ശ്രദ്ധയോടെ കേട്ടിരിക്കാറുണ്ട്. പുതിയകാലത്തിന്റെ സാംസ്കാരികപ്രശ്നങ്ങളെ പുകസ വേണ്ടതുപോലെ തിരിച്ചറിയുന്നില്ല എന്നാണ്‌ അതിൽനിന്ന് മനസ്സിലാക്കാൻ കഴിയുന്നത്. നവലിബറൽ കാലയളവിലെ സാംസ്കാരിക പോരാട്ടത്തിന്റെ ദിശാബോധം പുകസ നേടിയെടുത്തിട്ടില്ല. മനുഷ്യരായ മനുഷ്യരെയെല്ലാം ബാധിച്ചിരിക്കുന്ന സാംസ്കാരിക രോഗങ്ങളിൽ നിന്ന് അവരെ രക്ഷിക്കാൻ അവർ ഇവിടെ എന്തുചെയ്യുന്നു എന്ന് വ്യക്തമാക്കിയാൽ കൊള്ളാം. ഉപഭോഗസംസ്കാരം സൃഷ്ടിക്കുന്ന വ്യാധികളിൽ നിന്ന് സമൂഹത്തെ മോചിപ്പിക്കാനും പുകസ ഒരു ചുക്കും ചെയ്യുന്നില്ല. ഇന്ന് ജാതിവാൽ മുറിക്കുന്നതിനേക്കാൾ ഗുരുതരമായ പ്രശ്നങ്ങൾ നമുക്കിടയിലുണ്ടെന്ന് കെ.ഇ.എന്നിനെ പോലുള്ളവർ മനസ്സിലാക്കണം.

അനർഘനിമിഷം മലയാളത്തിന്റെ അതുല്യകഥ




ബഷീർ ഇനിയും പിടികിട്ടാത്തൊരു സമസ്യയാണ്‌. അനർഘനിമിഷം മലയാളകഥാവിമർശനം വേണ്ടത്ര മനസ്സിലാക്കിയിട്ടുണ്ടോ എന്ന് സംശയമാണ്‌. ദൈവം, മരണം, ജീവിതം എന്നിവയെ ഈ കഥ എത്ര സുരക്ഷിതമായി കലാപരമായി പ്രശ്നവത്കരിക്കുന്നു എന്ന് നാം ആഴത്തിൽ മനസ്സിലാക്കേണ്ടതാണ്‌. സാധാരണ ഒരു കഥയുടെ റേഞ്ച് വിട്ടുയരുന്ന ഒരു കഥയാണിത്. ദൈവത്തെ എത്ര ആഴത്തിലും പരപ്പിലും ബഷീർ അനുഭവാത്മകമാക്കി എടുത്തിരിക്കുന്നു എന്നതിന്റെ സൂചനയാണ്‌ ഈ കഥ. ദൈവത്തെ ബഷീർ നല്ലതുപോലെ വശപ്പെടുത്തിയിരുന്നു എന്നതിന്റെ നിത്യസാക്ഷ്യമാണ്‌ ഈ കഥ.


മണലാഴം




വ്യത്യസ്തമായൊരു പരിസ്ഥിതി നോവൽ. പത്രപ്രവർത്തകനായ ഹരി കുറിശേരിയുടെ ‘മണലാഴം’ ശ്രദ്ധിക്കപ്പെടേണ്ട ഒരു നോവലാണ്‌. മണ്ണിട എന്ന സ്ഥലത്തെ കേന്ദ്രമാക്കിക്കൊണ്ട് ഭീകരമായ മണലൂറ്റിന്റെ കഥ പറയുന്ന നോവലാണിത്. ഇതിനെതിരെ വികലാംഗനും സംസ്കൃതാധ്യാപകനുമായ സച്ചിദാനന്ദൻ എന്ന അധ്യാപകന്റെ നേതൃത്വത്തിൽ നടത്തുന്ന ചെറുത്തുനിൽപ്പിന്റെ കഥ ഈ നോവൽ ശക്തമായി അവതരിപ്പിക്കുന്നു. മനുഷ്യന്റെ പ്രാകൃതവാസനകളെ നേരിടാൻ ഒരു സംസ്കൃതാധ്യാപകനെ കേന്ദ്രകഥാപാത്രമാക്കിയതിൽ പാത്രസൃഷ്ടിയുടെ ഒരു അപുർവ്വതയുണ്ട്. ഭൂമിയെ വികൃതമാക്കുന്നതിനെ നേരിടാൻ വികലാംഗനെ സൃഷ്ടിച്ചതിലും ആലോചനയുടെ വലിയ സൗന്ദര്യമുണ്ട്. അയാളെ അർശോരോഗിയാക്കിയപ്പോൾ പ്രകൃതിനിയമം എന്ന നോവലിലെ കേന്ദ്രകഥാപാത്രത്തെയാണ്‌ ഓർത്തത്. ആസ്മ രോഗിയായിരുന്ന നക്സലൈറ്റ് നേതാവ് ചാരു മജൂംദാറിനെയും ഈ നോവൽ വായനയിൽ ഓർത്തിരുന്നു പോയിട്ടുണ്ട്. രോഗവും പ്രതിഭയും തമ്മിലുള്ള ബന്ധത്തെക്കുറിച്ചും ഓർത്തുപോയി. സംസ്കൃതത്തിന്റെ കാവ്യസൗന്ദര്യലോകം നോവലിൽ ഉപയോഗിച്ചത് ആഖ്യാനത്തിന്റെ വലിയ അഴകിനാണ്‌ കാരണമായി തീർന്നിരിക്കുന്നത്. ഈ നോവൽ കേരളം ശ്രദ്ധയോടെ വായിക്കേണ്ടതാണ്‌.


സി.രാധാകൃഷ്ണന്‌ എഴുത്തച്ഛൻ പുരസ്കാരം




സി.രാധാകൃഷ്ണന്‌ കേരള സർക്കാർ എഴുത്തച്ഛൻ പുരസ്കാരം നൽകി ആദരിച്ചത് സമുചിതമായ ഒരു സാംസ്കാരിക നടപടിയാണ്‌. സി.രാധാകൃഷ്ണന്റെ നോവലുപാസന പണ്ടുതന്നെ ഞങ്ങളെയൊക്കെ വളരെയേറെ സന്തോഷിപ്പിച്ചൊരു സാഹിത്യപ്രവർത്തനമായിരുന്നു. സി.രാധാകൃഷ്ണൻ ഭാഷാപോഷിണി എഡിറ്ററായിരുന്ന സമയത്ത് അദ്ദേഹവുമായി എനിക്കൊരു അടുപ്പമുണ്ടായിരുന്നു. ഒരു genuine എഡിറ്ററായിരുന്നു അദ്ദേഹം. ഇന്നത്തെ ഭാഷാപോഷിണി എഡിറ്റർ കെ.സി.നാരായണിൽ നമുക്ക് ഈ മൂല്യം കണ്ടെത്താൻ കഴിയില്ല. പുതിയ കാലഘട്ടത്തിൽ മനുഷ്യമനസ്സ് അനുഭവിക്കുന്ന വിഹ്വലതകളെയും സങ്കീർണ്ണതകളെയും ആഴത്തിൽ തിരിച്ചറിയാനും ചരിത്രത്തിൽ നിന്നും പാരമ്പര്യത്തിൽ നിന്നും വർത്തമാന സാഹചര്യങ്ങളിൽ നിന്നും വിവേകം ഉൾക്കൊണ്ട് അവയ്ക്ക് പരിഹാരം നിർദ്ദേശിക്കാനും സി.രാധാകൃഷ്ണൻ തന്റെ രചനകളിലൂടെ ശ്രമിക്കുന്നുണ്ടെന്ന അവാർഡ് കമ്മറ്റിയുടെ വിലയിരുത്തൽ പൂർണ്ണമായും ശരിയാണ്‌.


തിക്കൊടിയന്റെ ശതാബ്ദി ആഘോഷം



തിക്കൊടിയന്റെ ശതാബ്ദി ആഘോഷത്തിന്റെ ഭാഗമായി ഗ്രന്ഥാലോകം ഒരു സംഘസംവാദം സംഘടിപ്പിച്ചത് ഏറെ അഭിനന്ദനീയമാണ്‌. എം.ടി, ഡോ.എം.എം.ബഷീർ, ഡോ.എം.സി.അബ്ദുൾനാസർ തുടങ്ങിയ പ്രമുഖർ ഈ സംഘസംവാദത്തിൽ പങ്കെടുത്തിട്ടുണ്ട്. ജീവിച്ചിരിക്കുമ്പോൾ ആഘോഷങ്ങളെ അവഗണിച്ചിരുന്ന തിക്കൊടിയൻ മരിച്ചതിനു ശേഷം ഇപ്രകാരം ഒരു സാഹിത്യസംവാദം സംഘടിപ്പിച്ചതാണ്‌ ഏറ്റവും പ്രസക്തമായ കാര്യം. നാടകത്തിനു വേണ്ടി ജീവിതം ഉഴിഞ്ഞുവെച്ച തിക്കൊടിയന്‌ നാടകത്തെ തീരെ അവഗണിക്കുന്ന ഒരു കാലയളവിൽ ഇപ്രകാരമൊരു ആദരവ് അർപ്പിക്കുന്നതിൽ ഗ്രന്ഥാലോകത്തിന്‌ പ്രത്യേകമായി അഭിമാനിക്കാൻ വകയുണ്ട്. നാടകം എന്ന മഹത്തായ കലയുടെ തിരിച്ചുവരവിൽ ഇതും ഒരു പ്രേരകമായി ഭവിക്കട്ടെ.


ഫിദൽ കാസ്ട്രോയ്ക്ക് പ്രണാമം




ലോകം കണ്ട അതുല്യനായ കമ്മ്യൂണിസ്റ്റ് ഫിദൽ കാസ്ട്രോ യാത്രയായി. രോമാഞ്ചത്തോടുകൂടി മാത്രമേ ഫിദൽ കാസ്ട്രോയുടെയും ചെഗുവേരയുടെയും ജീവിതയാത്രയിലൂടെ നമുക്ക് കടന്നുപോകാൻ സാധിക്കൂ. അവർ പ്രകടിപ്പിച്ച നിശ്ചയദാർഢ്യം ലോക കമ്മ്യൂണിസത്തിന്‌ പ്രചോദനമാകേണ്ടതാണ്‌. സാമ്രാജ്യത്വത്തിനും മുതലാളിത്തത്തിനും എതിരേ ധീരമായ നിലപാടുകൾ സ്വീകരിക്കുകയും ആ പാതയിലൂടെ ഒരു രാജ്യത്തെയും ജനതയെയും നയിക്കുകയും ചെയ്യുക എന്നത് ചരിത്രത്തിലെ അവിസ്മരണീയ അധ്യായങ്ങളാണ്‌. സാമ്രാജ്യത്വവും മുതലാളിത്തവും മനുഷ്യരാശിക്ക് ആപത്കരമാണെന്ന തിരിച്ചറിവ് നേടുകയും അതിനനുസരിച്ച് ജീവിതം ക്രമപ്പെടുത്തുകയും ചെയ്ത ആ ധീരനായ കമ്മ്യൂണിസ്റ്റ് നേതാവിന്‌ സംസ്കാരജാലകം പ്രണാമങ്ങളർപ്പിക്കുന്നു.


ഷാനി പ്രഭാകറിന്റെ ‘പറയാതെ വയ്യ’.




മനോരമ ചാനലിൽ ഷാനി പ്രഭാകർ അവതരിപ്പിക്കുന്ന ‘പറയാതെ വയ്യ’ പരാജയപ്പെടുന്നു എന്ന കാര്യം സംസ്കാരജാലകത്തിന്‌ പറയാതെ വയ്യ. അതിവാചാലതയാണ്‌ അതിന്റെ ഏറ്റവും വലിയ ശാപം. ചിന്തയുടെ നിശിതത്വമില്ലായ്മ, ആഖ്യാനത്തിന്റെ സൗന്ദര്യമില്ലായ്മ, കൃത്യതയുടെ തകർച്ച എല്ലാം ഈ പരിപാടിയെ വഷളാക്കുന്ന ഘടകങ്ങളാണ്‌. മാതൃഭൂമി ചാനലിലെ ‘ഞങ്ങൾ ക്കും പറയാനുണ്ട്’ എന്ന പ്രോഗ്രാമും സ്ഥിരം പാറ്റേണുകളുടെ മടുപ്പുകൊണ്ടും സജീവതയുടെ അഭാവം കൊണ്ടും വഷളായിക്കൊണ്ടിരിക്കുന്നു എന്നും പറയാതെ വയ്യ.


കട്ടപ്പനയിലെ ഋതിക് റോഷൻ




കട്ടപ്പനയിലെ ഋതിക് റോഷൻ സിനിമയെക്കുറിച്ചുള്ള സിനിമയാണ്‌. ഇത്തരത്തിലുള്ള സിനിമകൾ മലയാളത്തിൽ നേരത്തെയും ഉണ്ടായിട്ടുണ്ട്. ‘ഉദയനാണ്‌ താരം’ എന്ന സിനിമ ഓർക്കുക. സിനിമയിലെ നാനാതരത്തിലുള്ള പ്രശ്നങ്ങൾ ഈ സിനിമ പ്രേക്ഷകനുമായി പങ്കുവെക്കുന്നു. വിഷ്ണുവിന്റെ തിരക്കഥ വിഷ്ണുവിന്റെ അഭിനയം പോലെ തന്നെ മികവുറ്റതാണ്‌. തട്ടുപൊളിപ്പൻ സിനിമയുണ്ടാക്കുന്ന മലയാളത്തിലെ താരരാജാക്കന്മാർ വിഷ്ണുവിൽ നിന്നും സിനിമ അഭ്യസിക്കേണ്ടതാണ്‌.


O


Wednesday, November 9, 2016

സംസ്കാരജാലകം-27

സംസ്കാരജാലകം-27
ഡോ.ആർ.ഭദ്രൻ















ബോബ് ഡിലന്‌ 2016 ലെ സാഹിത്യനൊബേൽ




ഒരു ഗാനരചയിതാവിന്‌ നൊബേൽ സമ്മാനം ലഭിച്ചു എന്ന കൗതുകം ഈ വർഷത്തെ സാഹിത്യ നൊബേൽ സമ്മാനത്തിനുണ്ട്. ഇതിന്‌ സാഹിത്യരംഗത്ത് വിമർശനങ്ങൾ ഉയരുന്നുണ്ട്. എന്നാൽ ഗാനശാഖയ്ക്ക് ലഭിച്ച ഒരു ആഗോള അംഗീകാരമായി ഈ പുരസ്കാരലബ്ധിയെ വിലയിരുത്താവുന്നതാണ്‌. അമേരിക്കൻ എഴുത്തുകാരനായ അദ്ദേഹത്തിന്റെ മനുഷ്യാവകാശ പോരാട്ടവും യുദ്ധവിരുദ്ധപ്രവർത്തനങ്ങളും ഏറെ പ്രശംസിക്കപ്പെടേണ്ടവയാണ്‌.


കാവാലം നാരായണപ്പണിക്കർ ഇനി ഓർമ



കാവാലം നാരായണപണിക്കരുടെ അന്ത്യം കലാകേരളത്തിന്‌ വലിയ നഷ്ടമാണ്‌ വരുത്തിവെച്ചിരിക്കുന്നത്. നാടകകൃത്ത്, നാടകസംവിധായകൻ, ഗാനരചയിതാവ്, തനതു നാടകപ്രസ്ഥാനത്തിന്റെ ഉപജ്ഞാതാക്കളിൽ പ്രധാനി എന്നീ നിലകളിലെല്ലാം കാവാലം എക്കാലവും ഓർമ്മിക്കപ്പെടും. കാളിദാസൻ, ഭാസൻ തുടങ്ങിയവരുടെ നാടകങ്ങൾ രംഗത്ത് അവതരിപ്പിച്ച് കാവാലം ഇന്ത്യയുടെ മുഴുവൻ ആദരവാണ്‌ പിടിച്ചു വാങ്ങിയത്. എം.ജി.സർവ്വകലാശാലയുടെ കോളേജ് അധ്യാപകർക്കുള്ള മലയാളം റിഫ്രഷർ കോഴ്സിൽ വെച്ചാണ്‌ കാവാലത്തിന്റെ ഒരു ക്ലാസ് എനിക്ക് കേൾക്കാൻ കഴിഞ്ഞത്. അത് ഒരിക്കലും മറക്കാൻ കഴിയാത്ത ഒരനുഭവമായി ഇന്നും മനസ്സിൽ സൂക്ഷിക്കുന്നു. സംസ്കാരജാലകത്തിന്റെ പ്രണാമങ്ങൾ അർപ്പിക്കട്ടെ!

തിരുത്ത് - റസീന കടേങ്ങൽ



റസീന കടേങ്ങൽ എന്ന എഴുത്തുകാരിയെ ഈ അടുത്ത സമയത്താണ്‌ പരിചയപ്പെട്ടത്. അവർ കൊല്ലം ജില്ലയിൽ തേവലക്കരയിലെ സ്ട്രാറ്റ്ഫോർഡ് പബ്ലിക് സ്കൂൾ ആന്റ് ജൂനിയർ കോളേജിന്റെ പ്രിൻസിപ്പൽ ആണ്‌. നന്നായി കവിതയും ചെറുകഥയും എഴുതും. ഒരു നോവൽ എഴുതിക്കൊണ്ടിരിക്കുന്നു. അത് ആറേഴ് വർഷങ്ങൾക്കു ശേഷമേ പ്രസിദ്ധീകരിക്കൂ എന്നാണ്‌ ടീച്ചറുടെ നിലപാട്. ടീച്ചർ എഴുതിയ ഒരു കവിത ഇങ്ങനെ വായിക്കാം.

തിരുത്തി തിരുത്തി
തിരുത്താനിടമില്ലാത്തൊരു
കുടുസ്സുമുറിയായിരിക്കുന്നു
നിന്റെ ഹൃദയം
ഞാനതിൻ 
വാതിൽപ്പടിയിലെ 
വലിയൊരു തെറ്റും!

പ്രണയത്തിന്റെ ഒരു സംഘർഷാത്മകത ചേതോഹരമായി ഈ കവിതയിൽ ആവിഷ്കരിച്ചിരിക്കുന്നു. കവിത സാന്ദ്രമാകുകയും എന്നാൽ വ്യക്തതയുടെ നിറം അണിയിക്കുകയും ചെയ്തിരിക്കുന്നു എന്നതാണ്‌ ഈ കവിതയുടെ പ്രത്യേകത.


ചാത്തന്നൂർ മോഹൻ




പത്രപ്രവർത്തകനും നാടകഗാനരചയിതാവും കവിയുമായ ചാത്തന്നൂർ മോഹന്റെ മരണം സാംസ്കാരികകേരളത്തിന്‌ കനത്ത നഷ്ടമാണ്‌ വരുത്തിവെച്ചിരിക്കുന്നത്. കെ.പി.അപ്പന്റെ ഒരു വലിയ ആരാധകനായിരുന്നു മോഹൻ. ആ നിലയിൽ കെ.പി.അപ്പൻ പറഞ്ഞും ചാത്തന്നൂർ മോഹനെക്കുറിച്ച് ഞാൻ കേട്ടിട്ടുണ്ട്. കൊല്ലത്തെ സാംസ്കാരിക പ്രവർത്തകർക്ക് അവിസ്മരണീയ ഓർമകളാണ്‌ അദ്ദേഹം പകർന്നു നൽ കിയിട്ടുള്ളത്. ചാത്തന്നൂർ മോഹന്റെ ദീപ്തമായ സ്മരണകൾക്ക് മുമ്പിൽ ആദരാഞ്ജലികൾ അർപ്പിക്കുന്നു.


അക്കപ്പോരിന്റെ 20 നസ്രാണി വർഷങ്ങൾ




ആടുജീവിതമാണ്‌ ബെന്യാമിന്‌ പേരും പെരുമയും നൽകിയ നോവൽ. അതിന്‌ സാഹിത്യ അക്കാദമി അവാർഡ് വരെ ലഭിച്ചതാണ്‌. യഥാർത്ഥത്തിൽ 2008 ൽ എഴുതിയ അക്കപ്പോരിന്റെ 20 നസ്രാണി വർഷങ്ങൾക്ക് അക്കാദമി അവാർഡ് ലഭിക്കേണ്ടതായിരുന്നു. അത് നൽകാതിരുന്നത് വലിയ അപരാധമായിപ്പോയി. മധ്യതിരുവിതാംകൂർ ജീവിതവും ഭാഷയും സംസ്കാരവും ഉയർത്തിക്കാണിക്കുന്ന ഈ നോവൽ ‘ആടുജീവിത’ത്തെക്കാൾ മികച്ച നോവലാണ്‌. നോവൽകല എന്താണെന്ന് ഈ കൃതി നമുക്ക് പറഞ്ഞുതരുന്നു.

മഹാശ്വേതാദേവി



എഴുത്തും ആക്ടിവിസവും ഒരുപോലെ കൊണ്ടുപോയ എഴുത്തുകാരിയായിരുന്നു. മഹാശ്വേതാദേവി. മഹാശ്വേതാദേവിയുടെ എഴുത്തുകൾ എക്കാലവും ഓർമിക്കപ്പെടുന്നതാണ്‌. ആദിവാസിക്ഷേമത്തിനു വേണ്ടി മഹാശ്വേതാദേവി നൽകിയ സംഭാവനകളും അതുല്യങ്ങളായിരുന്നു. വിമോചനത്തിനു വേണ്ടിയുള്ള പോരാട്ടങ്ങളും സ്വപ്നങ്ങളുമായിരുന്നു ഈ എഴുത്തുകാരിയുടെ രചനകളിലെ ഏറ്റവും പ്രധാന ധാര. മഹാശ്വേതാദേവിയുടെ നിര്യാണത്തിൽ സംസ്കാരജാലകം അനുശോചിക്കുന്നു.


‘പുലിമുരുകനും’ ‘കൊച്ചൗവ്വ പൗലോ അയ്യപ്പ കൊയ്‌ലോയും’

ഇപ്പോൾ കൊട്ടിഘോഷിക്കുന്ന പുലിമുരുകനെക്കാൾ ശ്രേഷ്ഠമായ ചലച്ചിത്രം ‘കൊച്ചൌവ്വ പൗലോ അയ്യപ്പ കൊയ്‌ലോ’ ആണ്‌. ഒരു പുതിയ അനുഭവലോകം ചലച്ചിത്രലോകത്തേക്ക് കൊണ്ടുവരുന്നു എന്ന മഹത്വം പുലിമുരുകനുണ്ട്. എന്നാൽ അത് പതുക്കെ കച്ചവടസിനിമയുടെ സ്ഥിരം ഫോർമുലയിലേക്ക് മാറുകയാണ്‌. ഇത് തിരക്കഥയുടെ പരാജയമാണ്‌. തിരക്കഥയുടെ കാര്യത്തിൽ സിദ്ധാർഥ് ശിവയുടെ 'കൊച്ചൌവ്വ പൗലോ അയ്യപ്പ കൊയ്‌ലോ' പക്വതയാർന്ന ഒരു സമീപനമാണ്‌ സ്വീകരിച്ചിരിക്കുന്നത്.



എഡ്വേർഡ് ആൽബി




വിഖ്യാത അമേരിക്കൻ നാടകകൃത്ത് എഡ്വേർഡ് ആൽബി അന്തരിച്ചു. അദ്ദേഹത്തിന്‌ 88 വയസ്സായിരുന്നു പ്രായം. മൂന്നുപ്രാവശ്യം പുലിസ്റ്റർ സമ്മാനം നേടിയിട്ടുണ്ട്. ‘എ ഡെലിക്കേറ്റ് ബാലൻസ്’ (1967), ‘സീ സ്കെയ്പ്പ്’ (1975), ‘ത്രീ ടോൾ വിമൺ’ (1994) എന്നിവയാണ്‌ നാടകങ്ങൾ. അദ്ദേഹത്തിന്റെ ‘Zoo Story' എന്ന ഏകാങ്കനാടകം പത്തനംതിട്ട കതോലിക്കേറ്റ് കോളേജിലെ EJPM ഹോസ്റ്റൽ വാർഷികത്തിന്‌ അവതരിപ്പിച്ചത് ഒരു വലിയ കലാനുഭവമായി എന്റെ മനസ്സിൽ ഇപ്പോഴും ശേഷിക്കുന്നു. അന്ന് EJPM ഹോസ്റ്റലിന്റെ വാർഡൻ ആയിരുന്നു ഞാൻ. എനിക്കായിരുന്നു നാടകത്തിന്റെ സംഘാടക ചുമതല. പ്രിറ്റി എഡ്വേർഡ് ആയിരുന്നു സംവിധായകൻ. ഇപ്പോൾ മനോരമ ചാനലിൽ ജോലി ചെയ്യുന്ന പ്രിൻസ് പാപ്പച്ചനും അന്ന് ഇംഗ്ലീഷ് സാഹിത്യ വിദ്യാർത്ഥിയായിരുന്ന രവിയുമായിരുന്നു നടകത്തിലെ അഭിനേതാക്കൾ.


'മോദസ്ഥിതനായങ്ങു വസിപ്പൂ മലപോലെ'  




എസ്.ഹരീഷിന്റെ ’മോദസ്ഥിതനായങ്ങു വസിപ്പൂ മലപോലെ‘ മാതൃഭൂമി ആഴ്ചപ്പതിപ്പിൽ വളരെ പ്രാധാന്യത്തോടെ പ്രസിദ്ധീകരിച്ചുവന്നത് എന്തുകൊണ്ടും ഉചിതമായി. പുതിയകാലത്തും നമ്മുടെ സമൂഹത്തിൽ നില നിൽക്കുന്ന വലിയ ജാതിവിചാരത്തെ മനോജ്ഞമായി അവതരിപ്പിക്കുന്ന കഥയാണിത്. ഭാഷയ്ക്കുള്ളിലെയും ആചാരങ്ങൾക്കുള്ളിലെയും ജാതിയെയും കഥ പുറത്തെടുത്ത് കാണിക്കുന്നു. ജാതിരഹിത പ്രേമവിവാഹത്തിന്റെ പശ്ചാത്തലത്തിൽ സ്ത്രീധനം, ജാതിഭ്രാന്ത്, പൊങ്ങച്ചം, ആഡംബരം എന്നീ സാമൂഹികവിപത്തുകളെ കഥ മനോജ്ഞമായി എടുത്തുകാണിക്കുകയാണ്‌. പ്രേമവിവാഹത്തിന്റെ ഒരു കഥാന്തരീക്ഷത്തിൽ നിർത്തിയാണ്‌ എസ്.ഹരീഷ് ഇതെല്ലാം ഒരു കഥാകൃത്തിന്റെ ഉത്തരവാദിത്വബോധത്തോടെ എടുത്തുകാണിച്ചിരിക്കുന്നത്. ശ്രീനാരായണഗുരു എന്ന സൈൻ (Sign) കഥ വളരെ കലാപരമായി പ്രയോജനപ്പെടുത്തിയിട്ടുണ്ട്. കോട്ടയം ബസേലിയോസ് കോളേജിലെ എന്റെ വിദ്യാർത്ഥിയായിരുന്നു എസ്.ഹരീഷ്. കഥ വായിച്ചുകേട്ടപ്പോൾ ഹരീഷിനെ ഓർത്ത് എനിക്ക് വലിയ അഭിമാനം തോന്നി.


ദക്ഷിണാമൂർത്തി 



ദക്ഷിണാമൂർത്തിയുടെ ആകസ്മികമായ മരണം കേരളത്തിലെ കമ്മ്യൂണിസ്റ്റ് പ്രസ്ഥാനത്തിന്‌ വലിയ ആഘാതമായിരിക്കുകയാണ്‌. മാതൃകാപുരുഷനായ ഒരു കമ്മ്യൂണിസ്റ്റ് നേതാവായിരുന്നു അദ്ദേഹം. ഒരിക്കൽ മാത്രമേ ഞാൻ ദക്ഷിണാമൂർത്തിയുടെ പ്രസംഗം കേട്ടിട്ടുള്ളു. പത്രപ്രവർത്തനത്തെക്കുറിച്ചുള്ള ഒരു പ്രഭാഷണമായിരുന്നു അത്. കമ്മ്യൂണിസ്റ്റ് താത്വികവശങ്ങൾ വിശദീകരിക്കുന്നതിന്‌ അദ്ദേഹം പ്രഗത്ഭനായിരുന്നു. ട്രേഡ് യൂണിയൻ രംഗത്തും  അദ്ദേഹത്തിന്റെ പ്രവർത്തനങ്ങൾ നിസ്തുലമായിരുന്നു. കേരളത്തിലെ കമ്മ്യൂണിസ്റ്റ് പ്രസ്ഥാനത്തിൽ പ്രതിഭാശാലികളായ നേതാക്കന്മാരുടെ വംശം അന്യം നിന്നുപോകുന്ന ഈ കാലഘട്ടത്തിൽ ദക്ഷിണാമൂർത്തിയുടെ മരണം അപരിഹാര്യമായ ഒരു നഷ്ടമാണ്‌ വരുത്തിവെച്ചിരിക്കുന്നത്. സംസ്കാരജാലകം ദുഖം പങ്കുവെക്കുന്നു.

O